حنين الذكرياتبتمنا من الشباب والصبايا اسامحوني لأني
أقصرت من موضوعي بشكل كبير جداااااااااااااااااااااااااااااااااااااااااااااااااااااااااااااااااااااااااااااااا
بتمنى يعجبكم.......
[img]
[/img]
بحن لقلب بنت اخضر
مـــن الـــحب اتعطـــر
ومن الكره عمره ما قرب
قلب لسة ماعرفش قسوة
ولا شاف غدر وفرقة
ولا مر بقلب م الدنيا اتحجر
بحن لايد بالخير اتمدت
وعيون م الفرحة ابتسمت
وقلوب بالحب ارتوت
وشفايف بالبراءة اترسمت
واحاسيس من غير كلام وصلت
بحن لأجمل ذكريات عشتها
من الزمن اللي عدى ومضى
بـــحـــن لـــلمــة الـــعيلـــة
ونــاس بالصحبة جــميلة
وقعدة على السفرة طويلة
في فطار وغدا وليلة
وتيتة في القعدة اميرة
وفي كل كلمة بالحكمة سديدة
وبالخبرة والعقل رزينة
تنقلنا من فكرة لفكرة جديدة
تحكيلنا حكاوي سندريلا
والــف لــيلـــة وـــليلــة
ايـــام وذكـــرى قــــديمة
عدى عليها سنين طويلة
بحنلهــا لــيلة ورا لـــيلة
وابص للسما بعيون شريدة
وارجع احن للذكرى القديمة
بــكـــل لـــحظة فـــيهـــا
سعيدة كانت او حزينة
واهمس للماضي وانادي
بــحــن لــــذكـــريـــــــاتــي
[img]
[/img]
صحيت من نومي منتعشة
حاسة براحة ويّا النشوى
كانت حالة غريبة عليا
بصيت للساعة لقيتها سبعة
نطيت من سريري بسرعة
وقمت هوباّ شدا الهمة
طليت ع الشباك الناس نايمة
وانا صاحية شكلي لوحدية
حسيته يوم مش في العادة
مفيش زحمة واصوات بزيادة
ناس بتنادي
ميكروباصات بتهاتي
ولا اصوات عمال نضافة
وعم حسن بتاع الطعمية
فينك يا راجل ع الصبحية
هما فين الناس ديا
مالك يا دنيا بس فاضية
مفكيش بني آدم ولا بني آدمة
قلت في بالي طب وانا مالي
اقوم اتوضا واصلي الركعة
وبسرعة بسرعة طلعت هدومي
شكلي اتأخرت ليه بتدلع!!
بس ولكن ايه الحكاية
حصلت حاجة ومش دريانة
مديري ما شقرش عليا
مخنقنيش وقلقلي منامي
شكله كدا رفق بحالي
وشافني طالع عيني يوماتي
يا سلام على دي طيبة وحنية
مش في العادة الحركة ديا
نزلت جري ركبت العربية
الله الله ع الدنيا الفاضية
ليكون في موكب ولا رياسة
مادي حاجة مش في العادة
شارع فاضي احساس يشرح
بدل الظيطة وملي المطرح
وصلت المكتب لقيته مقفول
مفيش ناس واقفة في طابور
ولا عم علي حارس المبنى
الناس ماتت ولاّ انا بحلم
سألت البقال ع الشارع
قولي يا عم القيامة قامت
رد وقاللي سلامة عقلك
مالك يا بنتي مش على بعضك
شاكة دا فيه حاجة غريبة
مش لاقية حد في البلد العجيبة
فين الزحمة الناس والهيصة
قاللي يا بنتي الله يعزك
شاكلك تايهة وناسية نفسك
النهاردة يبقى اجازة
اي اللي يصحي الناس من بدري
بصيتله البصة ببلاهة
وفتحت بقي بغباوة
طلعت موبايلي لقيتها الجمعة
هانت عليكي يا عدة العشرة
حبكت يعني ترنيلي
دا انتي باينلك بتستقصديني
ولا انا كدا جالي زهايمر
والشغل خلاص جابلي الهسهس
يا خسارة اليوم اللي ضاع
ودماغي اللي جالها صداع
النومة طارت ادام عنيا
وانا بتفرج كدا ولا دارية
رجعت البيت غيرت هدومي
ورميت نفسي زي اللوري
على كنبة كانت جنبية
غمضت عيني وقولت انام
وييجي النوم من فين يا سلام
ما خلاص مبقاش منه فايدة
لكن على مين خليكي رايقة
مستحلفالك يا جمعة يا ضايعة
[img]
[/img]
استنيتك سنين كتير
استنيت كلمة منك
حلمت بيها من زمن طويل
استنيت تبقى ليا وابقى ليك
استنيت اعيش في حضنك
واموت وانا بين ايديك
استنيت تيجي
تصارحني بحبك ليا
وانك مش راضي لقلبك
يعيش غير بس بيا
ومفيش شريك في الدنيا ديا
ممكن في يوم يشاركك فيا
واستنيت استنيت
كل يوم اقول هيقول
هيصرح باللي جواه على طول
دا مش هيقدر يوم على بعدي
واكيد مش هيلاقي الراحة بعدي
ولاّ انا حلمت حلم مكنش ليا
اتخيلت حاجة بعيدة عليا
كل يوم معاك بيزود
شوقي وقربك ليا
شكيت في نية البعاد
وانك واخدني هدنة لحياة جاية
واستنيت استنيت
ويا وجع الانتظار لحلم بعيد
لكن خلاص انا مش هستنى
ومش هبقالك بس صورة
ووقت تقضيه شوية
بتقول لقيت الراحة فيا!!!
طيب وانا..
فاكرني هرضى بالحالة ديا
خلاص البعد عندي ارحم
وهسيبك لقلبك هو يقرر
انا مش ملجأ رعاية وحنان
ولحد كدا فاض بيا من الكلام
هبعد واسيبك عايش في اشتياق
اصل الضعيف ملوش عندي مكان
عايش متردد ملكش قرار
استنيت واستنيت
ايوة اساعد
ابقى قلب يطبطب يساند
لكن قلبي ليه عندي حق
وانا ظلمته معاك وتعبت
والانتظار خلاص مني مل
وبعادي عنك قرار نهائي
مش هفضل اسيرة لحلم في خيالي
ولو فكرت انك تيجيلي
بعد النهاردة مش هتلاقيني
خلاص انتظاري يأس
وكفاية عليه منك مل
[img]
[/img]
خبط عليا ساعي البريد
قاللي افتحي
قلبي انقبض
حسيت احساس مش سوي
طول عمري بجري عليه اسأله
عندك جواب؟
او حاجة منك تطمن قلب مستني خبر
طول الساعات يفكر في اللي فاته من زمن
سابه وحيد وسط الألم
يرد بعينه من سكات
ماتعشميش نفسك خلاص انتهى
كل اللي بينكم خلاص خلص
وفات الأوان
اقوله لا لسة فيه أمل
ليه يقطع الود اللي
عشنا فيه من زمن
كنا زمان
ما يعدي ليلة او يومين
إلا ويبقالي منه جواب
جاي مع ساعي البريد
اقراه بكل شوق وياّ الحنين
واخبيه تحت مخدتي
يشاركني حلمي وياّ الونس
اقوم عليه اخده في حضني
حاجة تفكرني بحبيبي
اللي فاتني من زمن
وعدني يرجع
ومسيرنا نبقى لبعضنا
لكن خلف
لا عاد ولا شوفته سأل
سابني لوحدي رغم عهده
مفيش بعاد
واني انا الماضي والحاضر والذكريات
بعدت ليه فارقتني
الغربة قست قلبك وليه سبتني
كان كلامك مش هغيب اكتر من سنة
قولت بلاش
اهي عدت سنة وراها سنة
ولسة الغياب..
شوف بقالك كام سنة
سرحت بخيالي شفت حالي كل سنة
وردة بتدبل تستنى منك ترتوي
وعدوا لكن ولا مليون سنة
نده عليا ساعي البريد
قاللي افرحي
جالك جواب من الحبيب
حسيت بقلبي بيتنفض
خطفت من ايده الجواب
وجريت على اوضتي افتحه
زي العادة ومن سكات
لحد يحس بيا
او تبان اللمعة اللي ف عنيا
بفتح وايدي بتترعش
خايفة من مستخبي وياّ الجواب
ويبقى احساسي خاينني
بصيت لقيتها دعوة فرح
زي ما حلمنا في يوم اترسم
بس كان حلم واتخطف
اسمك جنب اسم واحدة مش انا
حلم انت لسة فيه البطل
لكن اميرتك معادتش انا
وبقيت كومبارس مستمع
ياترى سعيد كدا ومنتشّي
فرحان اوي...طيب وانا
فكرت فياّ
ايه كان كل ذنبي
لما بإيدي ألقى شهادة وفاة حب اتقتل
ونهاية كل حاجة حلوة كانت لنا
ويبقى دا هو جزات قلب حبك
عاش على عهدك ووعدك
ولاّ غربتك كدا موتت
اي احساس بيننا في يوم اتولد
ومبقتش فارقة في حاجة عندك
وآدي اخرت انتظاري
وشوقي اللي سهرني ليالي
دعوة فرح جوا جواب
اضمها وياّ اختها جوا الدولاب
[img]
[/img]
حبيتك معرفش ليه
حبيتك ازاي وامتى
حسيتك بقيت حاجة مني
وفي ثانية ساكن فيا
ساعتها شفت بعيني ضعفي
لما يوم فكرت عليك اجري
واقولك كل ما بيا
طول عمرك موجود في حياتي
و مافرقتش حاجة في ذاتي
يوم ما احتجتك جنبي
ملقيتكش حبيبي قصادي عندي
حبيتك ولا ايه اللي جرا ليا
حبي خذلني وجرح فيا؟؟؟
دا مهما كان الحب عندي
يوم ما تجرح فيه كرامتي
يبقى مش عايزاه مستغنية
واللي كان غالي في يوم
بكرة ييجي يهون عليا
طول عمرك بتجري ورايا
وتتمنى تنول رضايا
ولا كان في بالي حبك
او فكرت في يوم اقولك
ان قلبي حاجة منك
بس فجأة سهاني خدعني
شاف حب اتمنيته عمري
ويوم ما سلم لكبرياءك
كنت اول جارح بإستهتارك
مابقتش عايزة حبك ليا
هو كان حب ولا حاجة تانية
حاجة مش في ايدك لقيتها صعبة
يوم ما ملكتها مابقتش فارقة
وانا من دلوقتي هعيش لوحدي
واقتل قلبي جوا مني
ارجع تاني قوية وعارفة
ان الحب مجرد لعبة
ومهما كنت يا غالي ليا
يوم والتاني مش هتأثر فيا
هبعد واعيش بس لذاتي
ومحدش يبقاله حاجة في حياتي
حب ايه اللي خطفني يا دنيا
خلاني بقيت واحدة تانية
اسوا ...احسن
اجن ... اعقل
اسعد ... احزن
اضعف ولا اقوى
رغم دا كله انا مش عارفة
[img]
[/img]
اعمل ايه لما احس
اني مش فاهمة نفسي
اوقات بحس اني في
غربة بس لوحدي
ماشية في طريق
اوله زي اخره
لا في جديد
ولا حتى قديم يرده
احساس غريب
اني مركب وسط مية
من غير شراع ولا دليل
هي على فين رايحة
غرقانة في بحورك يا دنيا
ودوامتك بتلف بيا
خايفة امشي مع تيارك
افوق ألاقيني مكاني ثابتة
وان فكرت امشي ضدك
يمكن اقع وميبانش ليا مطلع
ادور في دروبك بين ناسك
على راحة البال ألاقيني تايهة
تايهة فيكي بدون عنوان
شاغلني بيكي مليون سؤال
ناسك اهلك ايامك عمرك
ياه وياه مش لاقية جواب
غربة فيكي وغربة منك
غربة حتى وسط اهلك
والعمر ضايع وسط الزحام
افكار احوال جوا بيبان
ورا كل باب مقفول
مجهول حزين مخنوق
والطريق لكل باب
ادامه سبق طويل بعيد
سباق بجري فيه
زي اي خيل جريح
قلب تعبان من السبق حزين
حزنه لايه ومن ايه وليه؟؟؟
يمكن لو عارف كان رضي و ارتاح
يا دنيتي نفسي اعقد معاكي اتفاق
تبقي يوم عليا والتاني تعوضيني
عن وجع بيكي فيا داب
خدي كل اللي تتمنيه
بس اديني راحة بال
ويا حب صافي
وقلب مش مجروح حزين
يا ترى راضية بعرضي يا دنيتي
ولا انتي طماعة تاخدي كل جميل
وتسيبيلي الغربة والقسوة
ووحدتي بس ونيس
[img]
[/img]
اكبر كدبة في حياتي عيشتها
معاك حبيت دنيا عمري ما اتخيلتها
شفتك انسان كبير ومثالي
طلعت صغير في عيني خاين واناني
حبيتها وحبيتني في نفس اللحظة
وتيجي ازاي مش قادرة افهمها
ضحكت عليا ولاّ عليها
مين فينا اللي قلبك لعب بيها
كنت بتوهمني اني الحب اللي في حياتك
وفي كل قصصك او روايتك
احس منها بظلم ابطالها لإخلاصك
وانك يا عيني مش لاقي الحب الصادق في حياتك
وهمتني اني اول حب في عمرك
والكلام كله على لسانك من جوة قلبك
سيبتني اتخيل حلم عيشتهولي
وخدتني فيه لعالم جميل هتحققهولي
ورغم كل ما فيك صدقتك
آمنت بكلامك وعشقتك
ولا فكرت ادور في اصل حكايتك
ان كنت كداب ولا صادق في عهدك
دا كلام كان بالنسبالي خلاص مسَلّم
ليه تعيشني كدبة انا مش ادها
دا انا سيبت الدنيا دي كلها
وقفت ادام ناس غلطتني
قالتلي معاك هدمر نفسي
قلت لا بعلو صوتي وبكل حسّي
دا حبيبي اللي ليا
ملوش غيري في الدنيا ديا
انسان بجد مش هلاقي زيه حد
طلعت مخدوعة اتضحك عليا
العيب في مين؟؟ اكيد دا فيّا
طيب وهي فكرت فيها
عمَلت ايه عشان تقسى عليها
انسانة تانية في مسلسل مظاليمك
اديتك عمرها وامنتك
على حياتها شريكة لطريقك
كسرت نفسها و هتدوق في يوم كسرتها
تعمل ايه اصلها حبيتك ونفسها خانتها
وقايمة مخدوعاتك مبروك سجلتها
سيبتها غرقانة مش لاقية مأوى
مش عارفة سكة ليها وتايهة
جاية تسألني رأيي أنا؟؟؟
دا انا آخر واحدة ممكن تتسأل
قالتلي انه حبيبي انا
جوايا صرخت لا دا عهدي انا
ولقيتك اكبر كدبة انا عيشتها
وطلعنا لعبة بتتلعب
تتسلى بيها شوية وتنبسط
وبعدها خلاص تسيبها تتكسر
بكرة قلبك دا هيتخدع
مش قادرة ادعي لربنا ينتقم
لكن مسيره يوصلنا منك حقنا
وتنادي علينا ننجدك
انده بكل قوتك
مش هتلاقي غير صدى صوتك يسمعك
كتر خيرك سيبت فيا بصمتك
وخلاص حب عمري ادامي انتهى
ومبقاش مني يا قلبي اي رجّا
بس ليا سؤال اخير بذمتك
لو فاكر حاجة حلوة ويا حد منّا عيشتها
كان حد بيننا يستاهل طعنتك
حبيت حد فينا ولا قلبك دا كان حجر
حاسب على نفسك في سكتك
بكرة الايام تلف واللي فيها يوم ظلم
هييجي عليه الدور وبإيده هو يتظلم
[img]
[/img]
فتحت عيني لقيته ادامي
ايدي في ايده
وضحكته مش مفارقة خيالي
سألني وقالي مالك يا ملاكي
يا ارق الخلق في دنيايا
بصيتله وانا مستغربة
ملاك ورقة.. امتى وفين
آآآه يا دماغي...
شكلي تهت ولا مش في وعيي
مت صحيت لقيتني في عالم لوحدي ؟؟؟؟
قالي انتي عمري و اميرة احلامي
جوا مني قلبي ونني وكل كياني
قمري اللي منور لياليا في سماكي
زاد استغرابي وسألت نفسي ايه الحكاية
لفيت اقوله متأكد اني المقصودة م البداية
ايه اللي جابك بس ورايا
ضحك نفس الضحكة اياها
وقالي يا اميرتي انا فارس زمانك
بين ايديكي عايش مكاني مكانك
زادت حيرتي والدهشة غلبتني
فهم دهشتي وخفف عني تعجباتي
قالي بكرة هتعرفيني
وهييجي يوم تفهميني
بس احكيلي قولي اللي بيكي
حاسك شايلة هم جواكي مداريكي
انت جني ولا ايه الحكاية
ايه اللي عرفك بالهم اللي جوايا
رد قالي قلبي حس باللي فيكي
مهما حاولتي تداريه وياكي
او تشيليه عن كل احبابك
حسيت براحة سكون في كلامه
حكيتله عن كل همي وحالي
وكمان اللي شاغل بالي
وانزاح الجبل من ضهري
دا كان وجعه قاتلني وقاطم وسطي
حسيته في عيني طبيبي الشافي
جاي ياخد بإيدي و يداوي
يداوي جرح مقدرش عليه اعظم مداوي
قاللي دي الدنيا علمتني
يوم ما تعند مسيرها
تيجي في لحظة و تبسط
بس لازم ادامها نجمد
ويوم ما توجع اشكي ربك
وفارسك هيبقى جانبك ساندك
سألته ايه سر اهتمامك
دا انا حسيت بأمان الدنيا في كلامك
حضني جوة عين مليانة حب وحنية
و قالي عايزة اصل القضية
القصد اني...
.يا اميرة ياللي نايمة
قومي اصحي شوفي الخيّة
الحلة شاطت واتحرقت طبختها
وانتي ولا داريانة يا تايهة
دا انا اللي شطت وتعبت نفسيتي
قمت بغيظي ويّا فرستي
هو دا كان وقته يا غريمتي يا حلتي
اهو ملحقش يقول قضيته
مش يمكن تكون هي هي قضيتي
تفتكري هشوفه في حلمي الجاي
ردت قالتلي يا حبيبتي انتي هتتجنني
مجنونة وماله بس انام واحلم من تاني
يمكن يعيد الكره
يفكر يزورني ولو حتى مرة
يشقر ويسأل عليا في منامي
رحت فين يا فارس احلامي
لسة كلامك مكملش معايا
ولا كتبنا النهاية في الرواية
[img]
[/img]
حكمت ذات يوم بالفراق
وكنتَ من اصدر القرار
فلا لمشاعري اي اعتبار
وما عليّ سوى التنفيذ
مطيعة دون ادنى اعتراض
رحلت وتركتني اعاني
حزنا دفينا حطم وجداني
ألملم شتات نفسي
وابحث بين ثناياها عن ذاتي
فارقتني وأخذت كل احلامي
وتركتني مع ذاتي أعاني
وحيده ابحث عنها بلا امل
فماذا يفيد بعدها الندم
والآن ماذا يا سيدي
ماذا يامن كنت حبيبي
عدت لماذا؟؟؟
أأصدرت قراراً بالرجوع
لا يا سيدي اخطأت العنوان
لم اكن لك ذات يوم ولن اكون
فأنا الان صاحبة القرار
ولماضيك لن اعود
فلم تترك لي اختيار
لا اريدك بعد اليوم
فقد قررت الرحيل ذات يوم
وانا اعلنها لك اليوم
سأرحل بعيدا عنك الآن
وقد رُدت لي كرامتي
عدت لعلمك بقدر مكانتي
ولكن لا يا سيدي لن اعد
نساء الدنيا لن تغنيك عني
ولن تستعيض بهن عن حناني وحبي
فليكن ولتذق مرارة الفراق
فقد ذقت منها اعوام عجاف
دعني وارحل فانا الان حرة
احيا مرة اخرى
القيت خلفي مرارة ذكرياتك
دمرتني سلبت مني عمري
فانا الان امرأة جديدة
اما انت فلا مكان لك بقلبي
فقد شطبتك من ايام حياتي
واقولها اليوم بملأ فمي
فلترحل وتتركني لحالي
فلن اعود إليك ما حييت
[img]
[/img]
والناس يا طير شايفينك مبسوط
وانت من الحزن بتتألم
حاسس بصرخة قلبك فيك
وانت ولا قادر تتكلم
عيون بتضحكلك جايالك لعندك
تهني وتبارك على فرحة اتسرقت
مبسوطين بتغريدك الحزين
مش فاهمين كل مافيك بيتمرد
كان حلم في يوم بريء
وشايفه ممكن يتكمل
لكن خلاص اديك صحيت
ونزلت لأرض حدودها اضيقت
قوم بص للسما من بعيد
و اطرد حاجة ماتت اكيد
قبل ما حاجات تكون اتولدت
يا طير ياللي شايل كتير
قوللي راحتك فين من بعده
الحمل عليك تقيل
وانت ولا قادر تكمل
كل ما تصحى من هم كبير
تلاقيك قايم على اكبر منه
كفاياك كسرة يا طاير حزين
وقوم اصرخ اتكلم
موجوع وشايل وياك الويل
على ايه تكتم وتتألم
خايف تبان مسكين ضعيف
ما انت شايل حمل يهد يقتل
اكيد احبابك هيبقوا معاك
شايلين الحمل كمان وياك
يا يقسموه يا يشيلوا منه شويات
محدش عايش في الدنيا لوحده
والوجع لازمله اللي يسانده
وكفاية حواليك ناس
تشيلك على راسها سنين وايام
فوق ياللا من الرقاد
والحزن اللي مالي كل مكان
طير اصرخ بأعلى صوت
اتكلم وقول من غير خوف
موجوووووع محتاجكم جنبي
جناحاتي صعب عليها تشيلني
وسمايا صعبان عليها حالي
عايزاني في حضنها بتندهلي
نفسي ارجع ارفرف تاني
وغنايا يملا الدنيا من قلبي
[img]
[/img]
بتسأل عني كل الناس
عايز تعرف اخباري
ما فوتنا بعض خلاص
بترّجع ليه الماضي
قلقت جيت على بالك
ولا قلبك رق لحالك
افهم وكفاية اللي جرى
حبي ليك خلاص انتهى
حاجة عدت اخدت وقتها
وكل فكرة جت في بالك
مجرد خيالك بيرسمهالك
فاكر اني باقية عليك
بتحلم حلم محال وساذج
عمري ما اتبعت واستنيت
يمكن بايعني يعرف مقامي
لا يا اللي كنت في يوم حبيب
مش هيحصل لو حتى اخرها عذابي
ابعد كفاية كدا وانساني
دا اتاريك انسان اناني
كنت في يوم فاكراك كبير
واني لا يمكن عنك اغيب
بس طلعت ولا حاجة
وغيابك عني خلاص عادة
ياترى قالولك عني ايه
ياللي رايح ليهم تسأل
قالولك باعت ونسيت
ولقت عمر جديد في بعدك؟
قالولك انك في عينها مفيش
ريح قاسية في يوم هبت
شالت معاها تراب وغيرة
غمت عيني بس لفترة
دي الغيمة عني انزاحت
والشمس رجعت وسادت
سامع اهي عصافير بتغرد
فرحنالي في بعدي عنك
دنا عمري ما ظلمت نفسي
غير يوم ما فكرت احبك
بس خلاص اطمن
ولا تتعب نفسك وتدور
حبك عندي مبقاش و اتحول
اد ما كنت في يوم بحبك
دلوقتي خلاص نسيت وكرهتك
[img]
[/img]
والبنوتة كبرت وادورت
احلوت بقت امورة واتشطرت
على راي المثل بالخراط اتخرطت
بيحسدوها اصحابها على جمالها ورقتها
بنوتة وسط زمايلها كاملة متكملة
العين عليها من كل ناحية
سبحانه الكامل اللي سواها على الصورة ديا
اخلاق وعقل رزانة ومتربية
جالها خطابها عالباب ملهوفين
يتمنوا ينولوا الرضا او حتى بس نظرة حنية
خطاب اشكال وألوان واقفين على بابها بروية
مش لاقية بينهم اللي ف خيالها و حلمها
مشافتش منهم اللي يستاهل قربها
سألت نفسها هما ليه حالهم كدا
ليه مبقاش فيهم اللي ممكن عليه تعتمد
وقلبها يتفتحله من غير ما بالاذن يتقبل
يكون ليها امان وحنان وحب وعليه تتسند
طيب وابن حلال لكن دماغه مش اد كدا
عاقل دماغه عال لكن بعيد عن ربنا
مثقف عارف في كل حاجة
بس اخلاق ضاعت في وسط دا
احتارت واستغربت دول منين طالبين يتجوزوا
يفتحوا بيوت ويشيلو مسئولية، هيقدروا؟
بصت لكل مافيهم وقالت خلاص
راضية اعيش لنفسي ويا نفسي بين الناس
ولا يوم اورط حياتي بحد من النوع دا
تبقى توريطة اخرتها كسرة قلب وتعب البال
مين فيهم يستاهل تكوني ليه امة
تشيليله اسمه وتصونيه تحافظي عليه وتراعيه
زي ما رب العباد وصانا واتقال في المثل
و اللي وردوا هما كدا مايستاهلوش حتى الرضا
عايزين جوازة والسلام
تقليد بس لدا ودا
وفِضّلها من كل دا لايمين مستغربين
قالوا بتضيع فرص بقالها سنين
دي شوية وشوية مش هتلاقي اللي يسأل
و اللي مش عاجبها دلوقتي
هتيجي يوم عليه و تندم
ولا عمره في يوم دا هيحصل
دي قبل ما تقرر بتحسبها وتفكر
خليهم يقولوا اللي في نفسهم
اي كلام كان عندهم
لكن هي ولا همها
وبجد الحق عندها
هتشيل قلبها لنصيبها
اللي ييجي في يوم يستاهلها
يا بلاش منها اساسا الفكرة ديا
[img]
[/img]
آه يا نفسي تعباني ليه
كانت نيتك منه ايه
لو كنتي قاصدة حاجة خير
والنتيجة كانت جرح كبير
عايزة دلوقتي مني ايه
ماخلاص عملتي عملتك
ظلمتي قلب في سكتك
كان كل ذنبه انه يوم صدقك
ولقيت عمايلك جرحته
دا الجرح فيك يا قلبي مش فيه
حاسس بوجع ساكن مش ناسيه
اسلوبك م البداية كان غلط
مين اللي قال انه غاية كويسة
يبقى طريقها ملوش سند
تفتكر شايفاكي ايه ادامي
قلب طيب ونفس خير يا زماني
لا انت وحش وصدق اللي يوم كان شبهك
مش من الارض ولا ليك علاقة بالبشر
ماحسبتهاش ليه صح قبل ما تتصدم
بسيكنتك غارزة في قلب مافي يوم فكر يجرحك
ولا كان يستاهل دا بعملتك
مهما قولت ولا اعتذرت
ذنبك ملازمك فين ما رحت
غصب عنك مكنش قصدك
بس يفيد ب ايه يا طعم المر
هتعمل ايه دلوقتي بس
هتنام مرتاح وفي ليلك ونس
الله اعلم كان ليه دا حصل
لكن والله ما كان بقصد
سامحني ياللي عليك القصد
يا اجمل قلب بين البشر
واطيب انسان نادر ما يتوجد
هتفضل صورة في بالي مضوية
بروازها الطيبة وياّ حب الخير
والصحبة النقية
و الضمير الحي ساكن رمزها
ربي يبعد عنك اي حزن او زعل
ويملا حياتك بس بالهنا والفرح
بحجم قلبك اللي شاف كتير
ومن الناس ياما اتظلم
سامحني جاية مقرة بذنب
للنهاردة مش متخيلة انه حصل
[img]
[/img]
آه منك يا زمن
قلبت الآية خليت الغالي مبقاش له ثمن
آه منك يا زمن
كبر فيك الرخيص وخليته بقى له سند
آه منك يا زمن
ناس قلوبها صافية فيها البراءة لقيتلها سكن
شردتهم في التوهة يروحوا وييجوا
ولا بقى ليهم امل
ويعملوا ايه فيك يا زمن
آه منك يا زمن
سيبت الجبابرة ينهشوا ويدبحوا
قلوب عاشت متحيرة
آه منك يا زمن
وقفت تتفرج على ناسك خيرهم ويا شرهم
بيجروا زي الوحوش على بابك
عايزين من الدنيا بس ينهبوا
آه منك يا زمن
لما خليت الحاجة الحلوة تندثر وتختفي
ويبقى السواد ماليكي ياللا ابسطي
آه منك يا زمن
مالك يا دنيا مقلوب ميزانك
بتفرقي بين احبابك
وسايبة اعداءك ينهشوا في بعض ويدمروا
آه منك يا زمن
مبقاش فيك مكان يتعاش
وسط الديابة والوحوش غزلان تتداس
لا بقينا عارفين نعيشك
ولا حتى نخرج من بين ايديك ونفترق
آه منك يا زمن
على قسوة دنيتك وعلى كل حاجة اتقلبت في سكتك
وتفضل الآهة جوانا مهما في يوم صفيتك
هنستنى وراها قلبتك
والاهة تدوي وتعلى مع كلمتك
آه منك يا زمن
[img]
[/img]
ماشية ومش عارفة رايحة فين
رجلي مودياني لحد فين
طريقي شايفاه مضلم من بعيد
حاولت اعدي واقرب واشوف
يمكن ألاقي للنور بزوغ
بس لقيتني ماشية للخوف
لا عارفة ارجع ولا اكمل عليه
وقفت في النص ابص
يمكن ألاقي حد يطل
ياخد بإيدي لفين معرفش
لأي مطرح الصح فيه اتنقش
لكن بس للأسف
لا لقيت نور ولا حتى حد إلتفت
يشوف البنت اللي واقفة مالها اتسمرت
والحزن والحيرة في ملامحها اتقسمت
ضيعت حاجة من ايدي بس ملقيتلهاش حل
يمكن تكون خير ليا او تبقى شر
تعبني ضميري وعمري
اللي شايفاه بيهرب مني من غير مفر
نفسي ألاقي لقلبي رد
رد يوافق عقلي في الصح
احترت ومش عارفة ارسى لبر
قلبي وجعني وبجد تعبت
مستنياك يااللي جاي تاخد بإيدي
لشط امان ملهوش حد
ياترى موجود ولا رحت زي اي حد
[img]
[/img]
انا ليه يا ناس تاعبة نفسي
ليه بحاول احسسه بنفسي
انا ليه بفكر كل ثانية اقوله عني
احكي حبي اللي ساكن جوة مني
انا ليه صعبان عليا بعده
رغم انه مش واخد باله منه
ما كفاية اسيبه وابعد عنه
وان حاس بيا يبقى ييجيني
يمكن وقتها يلاقيني زي ما انا
مستنياه بشوقي وحنيني
او بقيت واحدة غيري
رسمت ملامحي مقاسي ايامي وسنيني
دا بعدي عنه كان على عيني
لا كان باختياري ولا بإيدي
بس صعبت عليا نفسي
عمري في يوم ما هجرح كرامتي
كان حبي ليه ملهوش حدود
بس طريقه مليان سدود
وانا اخترت اعيش لوحدي
اطبطب عليا واداوي جرحي بنفسي
مش عايزة منه اي حاجة
هرحل وهبعد شايلة حزني
و قلبي مجروح ورايا
دا قربي منه خلاص استحالة
و افتكر خلصت بيننا الحكاية
قبل ما كان يتكتبلها ف يوم بداية
[img]
[/img]
اوقات بحس اني محتاجالك
محتاجة اهرب من نفسي ليك
اعيش جوة قلبك وادفا بيه
اوقات بشوف عمري ادامك
حلم قريب لمساه بالإيد
انت قريب مني
ولا وهم عيشته لنفسي
انت حاجة ساكنة فيا
حتة مني عايشة بيا
ولا سراب بهرب بيه
بنفسي م الدنيا ديا
اوقات بفكر عايزة انا منك ايه
عايزاك معايا تضمني
اعيش في حضنك
واحس في قربك بالامان
ولا عايزة حد معايا قريب مني
يعيشني حالة عايزة اعيشها من زمان
اوقات اسأل نفسي ليه بفكر فيك
ليه شاغلة بالي ومهمتمة بيك
بدور على اهتمام لحظي
ولا حب وامان ابدي
انت مين بالنسبة ليا
نفسي اعرف بس مش لاقية اجابة عليا
اوقات بحس اني مش عايزاك
في حياتي اللي جاية
مش عايزة اربط نفسي بحبل
اعيش بيه عمري وايامي بأبدية
اوقات بحس اني عايزة ابقى حرة
مش عايزة يربط اي حد نفسه بيا
مش عايزة اظلم ولا اكسر قلب
حبني وخاف عليا
ملا عمري بكل حنية
عايشة بغزالة يوم احب ويوم اكره
يوم اقرب أحكي افرح
ويوم في لحظة ابعد
هي انا وانا هي ..
حالة عايشة جوة فيا
مش هتلاقي ليها طريق ولا سكة تانية
ولا يوم ممكن توصل فيها لنهاية منطقية
تقدر تكمل ويا حد عايش بالحالة ديا؟؟
تستحمله بكل حالة
غريبة كانت او عادية
وان كان جوابك عليا ايوة
يفضل سؤال عايش فيا
انت ايه ومين بالنسبة ليا
[img]
[/img]
بحبك ايوة بحبك بس خايفة
خايفة منك ومن حبك لـ ياخدني لدنيا تانية
دنيا انا مش ادها ولا هقدر اكون يوم فيها تايهة
بين خبايا قلبك اللي مش فاهماله حاجة واضحة وباينة
زلزللي كياني وشدني من ارض صلبة كنت واثقة فيها وثابتة
خايفة منك لان عمري ما حبيت في الدنيا قبلك
ولا هييجي يوم واحب فيها حد بعدك
خايفة منك سرقت قلبي في يوم وليلة على غفلة
اخدته مني .. بقى مش ملكي ولا تحت امري
أأمر ينفذ وينسى
خايفة من شوقي اللي عايش في بحور غرامك
هايم يحدفني لعندك
رغم اني لسة ما تعلمتش اسبح ويا الموج
لييجي في يوم يغرقني منك
يا حبيبي رغم حبي ليك حسا بحاجة موقفاني
شيء مانعني امشي في طريق
مش عارفة نهايته لفين موديان
بحبك رغم اني شايفة فيك غموض
وحاجة مش باينة ليا
حاجة حاسة جوا مني
شيء بيهتف يقولي دي مستخبية
ليه رافض تصارحني
تقوللي ايه اللي شايله مخبيه عليا
انا اللي عمري ما انهزمت ولا اتهزيت
او قصاد الحب انكويت يا دنيا
انا اللي شفت ياما
لكن ولا مرة قلبي سلّم وسابني يدق بيا
انا اللي دايما كنت اقول
اني اقوى من كل حب الدنيا ديا
مهما كان مين اللي قاللي انه داب وحب فيا
يا حبيبي غيرت كل حاجة عيشتها صدقتها
وزرعتها طول العمر ليا
مش رافضة حبي ليك اللي عيشني
في حالة عمري ما حلمت بيها ثانية
ولا طالبة الحجر على قلبي
في قراره وحكمه اللي صادر عليا
اانا بس نفسي اتطمن واطمنه
ان حبيبه مش هيلاعبه في ليلة يكسره
او يسيبه للزمن يقسى عليه ويعذبه
انا بس عايزة احس بحنانك
وامانك اللي شايفاهم بين ايديك
مش هييجي يوم عليهم
ينقصوا او حاجة حلوة بيننا تتخنق
او اني اشوفك حلم عشته وانتهى اصبح سراب
زي ياما ما اتعمل في ناس كتير قبلي انا
تعالى خلصني من خوفي واقتله ..
اوجد مكانه راحة البال اللي ضاعت في الدنيا وانقضت
جايز ألاقي حاجة منها بين ايامنا اللي جاية و نعيشها سوا
فينك... يا قلب اندمج فيا وعاش جوايا
ولا هقدر اخرجه لو بعد مليون سنة
فينك... تعالى اسمع ندايا من قلبي اللي انقسم
مبقاش بحبك حاسس بالزمن
فينك... جاوبني ماتسبينيش في حالة التيه اللي عايشاها
واحساسي بالألم
اكلم نفسي واعيد وازيد مفيش اجابة..
خوفي في الآخر ملاقيش غيري انا ويا الندم
فينك... ياللي سميتك حبيبي وعاش حبك
جوا قلبي ويا انفاسي سكن
[img]
[/img]
نِفسي ارجع زي زمان
افرح اغني واضحك من قلبي كمان
نفسي اصرخ اقول آه ياني
هبة رجعت ليها يا ناس من تاني
والضحكة مش مفارقاها ثواني
نِفسي ارجع زي زمان
مش شايلة هم القيل والقال
ولا شايلة هم زمان ومكان
ولا شغل وعيشة مش ناقصة جنان
ومين فيهم قال والتاني دا عاد
نِفسي ماشيلش هم الدنيا
واعيش عمري خطوة بخطوة
تقسى عليا اسيبها لــ تهدى
تلين حبة اسايسها مودة
نِفسي مأفكرش في بكرة
وابقى عايشة عشان النهاردة
نِفسي ارجع اكتب واكتب
وعن مشاعري اسرد واحكي
نِفسي آجي اقول وادون
والناس ترجع تاني تشجعني
نِفسي امحي ذاكرتي لفترة
وانسى الثانية فيها واللحظة
نِفسي اسيب نَفسي لمزاجي
تعمل ما بدالها من تاني
نِفسي ما احرمهاش من حاجة
ولا افرض عليها ولا حاجة
أسيبها تعيش زي ما تحب
تود و تكره تفرح تغضب
اللي تحبه هي وبس
واللي يزعل منها ما يزعل
واللي يقرب يا هاي ويا مرحب
مش عايزاها تلومني تقسى عليا
تسألني في مرة ليه عملتي كل دا فيا
وانا واقفة و مش لاقية الكلمة
ارد بيها عليها ولا عارفة
نِفسي اشوفها قوية وقادرة
واللي مايعجبهاش مش لزمة
واللي يزعلها لو مرة
تديله ضهرها مش طالبة
اللي عايزني كدا ياسلام
واللي مش عاجبه ياللا سلام
دي الناس بتروح وبيجي غيرها
بس انا نَفسي مليش غيرها
ياسلام لو كان كدا يتحقق
وتصّفِي الناس كدا على مهلك
ميبقاش اللي معاك غير يستاهلك
و رغم دا حقي وانه طبيعي
انا سايباها زي ما تيجي
نِفسي ونِفسي ونِفسي ونِفسي
بس مؤقت صعب يا نَفسي
[img]
[/img]
وليه يا قلبي لسة لدلوقتي بتحن ليه
تشتاق للمسة من ايديه
والضحكة اللي كانت تملالي عينيه
ليه لسة فاكر انه في يوم هيعود
رغم البعاد والعمر اللي عدا من سنين
ليه حنينك رجعك لشط قلبه وذكرياته
اللي مليان شوق يقضي عمر ورفاته
ليه يا قلبي لسة لدلوقتي بتحن ليه
ليه راجع تفتكر اللي فات بالحلو والمر اللي فيه
ولا عارف ان اللي عشته مش هيتكرر مع حد بعده
مش انت اللي قلت انك تفارق وتبعد وتسيب بينكم مفارق
يبقى شاغل بالك ليه دايم بيه
وماشي تتقص وتسأل هو فين ولا عامل ايه
مش هيتعب او هيضعف عشان مكانش اللي ظالم
وهيلاقي حبيبه اللي يجيله يردله حقه اللي كان بيك ضايع
يبقى متشغلش نفسك ولا تتعب عمرك على اللي فاتك
واللي حصل واللي كان رسم حرفه الاخير في كتاب حياتك
لو كان نصيبك عمرك ما كنت تفكر تفارق
ولا تبعد وهو سايب قلبه وياك ساكن
لو كان حبيبك عمرك في يوم ما كنت بعت قلبه لما جالك
وخذلت حبه اللي كان عايش دايما في احضانك
لو كنت شايف انك ترجع الماضي تبقى سهيت
دا الماضي عمره ما بيرجع لو جرينا وراه سنين
ظلمت نفسك وظلمته بيك
يبقى تستاهل لهفتك وحزنك عليه
كنت فاكر انه هيحارب لحب يفضل طول العمر باقي
كنت ناسي ان سنة الحياة يتباع فيها البايع مهما كان غالي
دا مش فارس الاحلام اللي نازل من حصانه يحارب المارد عشانك
ولا انتي الاميرة اللي مستنياه بلهفة شوق وقلب صادق
يا قلبي بعت يبقى تستاهل اللي جرى او هيجرالك
قوم يا اللي ماليك الضعف من غيبوبتك وفوق من وهمك كفاية
اياك تدور تاني او تسأل عن الحكاية
خلاص دي حكاية خلصت وانتهت قبل البداية
حاول تعيش حياتك اللي جاية وانت شايل درس عشته في ذكرياتك
ومهما طال الشجن مسيره يخف ومن جراحه يطيب ويلملم البقايا
عيش حياتك بكل ما فيها دا اللي انكسر مش هيرجع على حاله قبل النهاية
عيش اللي باقي منك و اتعلم بلاش الجرح في يوم تاني يتكرر كفاية
[img]
[/img]
يا على الدنيا لما تاخدنا من اعز الاحباب
وتبعدنا عنهم شهور من العذاب
لا بايدينا ولا بايدهم نبعد كدا ولا الاغراب
ليه يا دنيا تبعدينا عن حبايبنا تفرقينا
نحلم بيوم الرجوع نرتمي ف احضان الشوق
حاسين انا لوحدنا والبعد قاسي وضمنا
ياترى لسة يا حبايب فاكرين القلب الغايب
عمره ما نسيكم في ليلة مهما طالت
ياترى لسة يا حبايب شايلين الود الباقي
عمره ف يوم ما ينقص او يقل او يساوم
ياترى لسة يا حبايب حافظين الوعد الدايم
فاكرة منه كل حرف وكلمة اتقالت قبل ما نفارق
طمنوني ..بردوا النار ف قلبي وعرفوني
دا البعد قاسي والغربة مرة والقلب شاكي
بينادي بيكم وفيكم ودموع العين نازلة عليكم
لكن الايام بتعدي ومش دايما واقفة معانا ف تحدي
ونرجع تاني نتقابل ف دنيا الخير والهنا الغالي
ومهما البعد طال زمن واتنين وتلاتة كمان
عمرنا ما ننسا احن قلب حبنا مهما كان
نحلم بيوم الرجوع من تاني والفراق يرحل عنا يغادر
كلاسيك 
موضوع: حنين الذكريات........ أجمل وأكبر شيئ في العالم.........؟؟؟؟ 
2010-01-19, 12:36 pm
اليومية
